مكنتش بستقبل ايميلات كتير علي ايميلي الشخصي فمكنتش بضطر افتحه الا قليل جدا بس اليوم ده كنت زهقان جدا قلت افتح افتش في اي حاجة يمكن الاقي حاجة تضيع الوقت و مود الزهق خصوصا ان اجازتي خلصت ومن بكرة راجع الشغل و دوشته من تاني
فتحت الايميل مفيش جديدة اعلانات و رسايل
و رسايل من التطبيقات المشترك فيها شوية عروض مفيش حاجة مهمة قلت فرصة افضي الميل بقي بس قبل ما ادوس مسح الكل لفت نظري عنوان غريب في النص ايميل باسم mi_ radi و عنوان الرسالة الرواية
رواية ايه ومين مي دي الي فاكره قبل اجازتي اني كنت طبيب تخدير
مليش علاقة بالروايات الا اني من وقت للتاني بحب اقراها
فتحت الرسالة بفضول لاقيت رسالة واضحة انها مكتوبة بصغية منفعلة و فيها استياء بتسال ليه لحد دلوقت محدش رد علي روايتها بالقبول او الرفض وانها ملتزمة بعدم ارسال الرواية لدار نشر تانية
لكن الوقت طال والمعرض بيقرب واكدت انه لو تم تجاهل الرد علي الرسالة دي هي هتعتبر ده رفض و تعبت الرسالة لدار نشر تانية
مكنتش محتاج ذكاء عشان اعرف انه ايميل مبعوت غلط ولسه هدوس مسح حاجة قالت لي استني ما تيجي نتسلي
تقمصت الدور و كتبت لها رسالة اعتذار وطلبت منها تبعت الرواية تاني
لان اكيد في غلطة حصلت و وعدتها برد سريع
وبصراحة كل الي كان في بالي اني هقرأ شوية اتسلي و اضيع الليلة و بكرة ابعت اقولها ان الرسالة راحت للايميل الغلط او حتي اعمل بلوك
بعد ٥ دقايق لاقيتها بعتت رسالة بملف الرواية اكدت انها في انتظار الرد ولو محدش رد بعد ال٣ ايام هتبعت لدار تانية
