الشاب اللي في الصورة ده اسمه "هشام زكريا" من محافظة الإسماعيلية.. "هشام" كان قاعد امبارح على القهوة مع مجموعة من أصحابه عادي جداً.. فيه شوية عيال صيع كانوا جنبهم وبيلعبوا بسخافة فجابوا أكياس ميه ورموها على "هشام" وطلعوا يجروا على أساس إنهم بيعملوا مقلب في حد مايعرفهوش يعني!.. https://t.co/pWzqpiWkl5

موقف مستفز، ويغيظ أى حد يعني.. قام "هشام" اللي اتفاجيء من التصرف بمنتهى العصبية عشان يجري وراهم بس للأسف من خضة الموقف ونرفزته وقع واتوفى في الحال بسبب أزمة قلبية!.. فجأة وفي نفس اللحظة بسبب شوية عيال ماشافوش ريحة الرباية راحت حياة شاب زى الفل في شهر رمضان..

مستقبل أسرة انتهى في نص دقيقة بسبب أب وأم كسلوا يعرفّوا عيالهم الفرق بين اللي يصح واللي مايصحش واستسهلوا إنهم يطلقوهم على الناس في الشارع يرازوهم ويقرفوهم.. كده كده أنا متأكد إن الداخلية هتجيب العيال دي خلال ساعات بس وبعدين!.. هيتعاقبوا ويدخلوا الأحداث؟.. وبعدين برضه!..

كُتر الفُرجة على برامج المقالب دوبّت الفرق بين اللي يصح واللي ميصحش وخلّت التنمر والرزالة وقلة القيمة وقلة الأدب هما أساس التعامل،وأطفال كتير مشاعرها تبلدت من العك اللي بيشوفوه على الشاشة!..ربوا عيالكم يا جماعة..الناس بتعرف تخلف وبتنسى تربي..ربنا يرحم هشام ويصبر أسرته وكل حبايبه.