1\11

العصر الذهبي للبنان: نمو الصناعة 1000%

بأكتر من ثريد فرجيت بالأرقام والوقائع كيف "لبنان الزمن الجميل" كان كذبة كبيرة لتسويق فكرة النظام الحاكم (يللي هو عبارة عن تشابك مصالح إحتكارية وسياسية وعصاباتية). بس للحقيقة، كان في زمن ذهبي للبنان، بس ما بيخطر على بالنا.

2\11

في 1966 إنهار بنك إنترا ومعه القطاع المصرفي (ثريد مخصوص عن هالموضوع لاحقاً). ومن بعدا صارت حرب 1967 يللي وقفت التدفقات المالية المسروقة من قبل الأنظمة العربية العكروتة بسبب الأزمة السياسية بوقتا. السياحة والمصارف أكلوها بالعتيقة بوقتا كمان.

3\11

الدولة اللبنانية طبعاً ما عملت شي، لا إيام شارل حلو ولا إيام سليمان فرنجية، ومتل العادة تركت الناس تدبّر حالا، وهيك صار. قدروا الصناعيين اللبنانيين (مش على شكالة فادي عبود) من خلال المبادرة الفردية يقيموا بالحمل، وإنتعشت الصناعة اللبنانية خلال فترة قصيرة، وكان نمو مرعب.

4\11

في الواقع، ما بين 1968 و1974، نمت الصناعة اللبنانية بنسبة 1000 بالمية، نعم ألف.

أول سبب حسب الرواية الرسمية: جهود الدولة: كذبة كبيرة. شبه الدولة ما عملت شي.

السبب التاني: حرب 1973 وغلاء النفط من بعد ما دول الخليج منعت النفط عن الدول يللي ساندت العدو الصهيوني.

5\11

صحيح غلاء النفط ساهم في نمو أسواق الخليج وسمح للصناعيين اللبنانيين يستغلوا الفرصة، بس هالأثر صار بآخر سنة أو سنتين من العهد الذهبي. وكمان، لبنان كان بلش يصدر بشكل كبير لأوروبا وكتير أسواق تانية غير الخليج. فنعم، غلاء النفط وطفرة الخليج ساعدت، ولكنها ما كانت السبب الرئيسي.