اطراف الدولة والمخاوف المشروعة!
-بعد استرداد سينا كان السادات عنده خطة طموحه لتعمير سينا وان التعمير وزيادة التواجد السكاني ضامن لعدم تكرار نكسة يونيو وبالفعل بدأ في خطة طموحة لتعمير سينا بالزراعة والصناعة والسياحة، لكن الموت لم يمهل السادات لتطبيق طموحه في تعمير سينا،
ولما تولى الرئيس مبارك الحكم كان بحكم تكوينه شخص متحفظ لا يحب الاندفاع، تباطئت في عهده ملفات تعمير سينا وده كان جزء من قناعة عنده ان سينا ارض حرب ومهما حصل فيها من تعمير هتيجي حرب تدمر كل شيىء، وعلشان كده كان مهتم بتطوير قطاعات معينة مرتبطة ارتباط وثيق بحالة السلام مع اسرائيل،
و ده ظهر في التناقض الرهيب بين التطور في جنوب سينا حيث شرم الشيخ وباقي المدن السياحية وبين باقي مدن الوسط والشمال اللي كانت مهملة باستثناء بؤر عمرانية متفرقة من خلال احد رجال الاعمال اللي قدر يعمل مصنع في وسط سينا و قرية سياحية في الشمال..
عمران رمزي لا يليق بامكانيات سينا واهميتها الاستراتيجية، الوضع في سينا كان قائم على علاقة امنية بحته بين الدولة وسكان سينا، علاقة فيها ريبة وشك من الطرفين تحول لنوع من الخصومة المعلنة بين الدولة وبين السكان، ونتيجة للخصومة دي اتحولت سينا لبيئة عدائية لفكرة الدولة نفسها،
وبدأت تظهر اشكال للانفلات من تهريب المخدرات والبشر لتجارة السلاح والانفاق والاخطر كان اختراق عدونا الرئيسي لها، مش كده وبس ده وصل الحال في وقت من الاوقات ان ايران قدرت تنشىء فيها ممر تهريب اسلحة جاي من الجنوب في السودان وصولا لغزة،
