١-ثريد طويل يمكن لأني مش معود اكتب هيك شي، تويتر بالنسبة الي هوي محل ليريّح الواحد و يتسلّى شوي، بجرب اتهضمن ، ضحك العالم و اتضحك، بس في ناحية تانية بتفرض علينا، وخاصة هلأ بحكم وضع البلد، بحكم شغلي و مسؤوليتي عن كذا عيلة بتخليني احكي بشي نتفة جدي لو ما رح يقدم رأيي و يأخر .
٢-في عالم قد ما هي بريئة، مفكرة إنو الأزمة فترة و بتقطع، انو رح نعشلنا كم شهر هيك و بكرا بيرجع بيمشي الحال، بينما لي عم يصير هلق هو تصحيح البلد و ارجاعو على ارض الواقع بعد ما كنا عايشين بمنظومة matrix مالية.
٣-هيدا التصحيح انفرض بالقوة علينا وقت خلص مخزون المصاري لي كان عم يجي عالبلد و عم نستعملو تنخلي الوهم الراكب و الحياة الفوق ادرتنا ماشية.
صح كان في فقر و في عالم ما استفادت من هيدي الرحلة، بس الفقير بهيديك الحقبة رح يصير معدوم بالإيام لي جاية،و الميسور رح ينزل على الطبقة الفقيرة
٤-مسؤوليتنا كشعب بتبلّش من فكرة انو نتقبل بأي منطقة عايشين،نشوف تركيا لي اقتصادنا حدها ما بيبين، "الرخص الوهمي"فيها لي كنا ننبسط وقت نسافر لهونيك و نصرف بالبلاش،الإنتاج و الصناعة و الزراعة و مساحتها، و مع كل هيدا الشي منروح و منفشخ عليهن بال ٦٠٠ دولار لي كنا نقبضهن كمعاش هون.
٥-مسؤوليتنا بتبلش اليوم مع ولادنا لي لازم نعلمهن انو تنطلع مصاري لازم نتعب، مش كلنا بدنا نكون تجار و نعمل كاش بس كسماسرة، مش كلنا لازم نكون اطبّاء ومهندسين.
مسؤوليتنا هي نبني فكرة انو لم الزبالة مش عيب، تنضيف البيوت مش عيب، تعبي بنزين و تغسل السيارة عالطرمبة مش عيب.
