ثريد تاني مهم
عشان الناس ما متذكرين او ما حضرو عشان صغار...
الإنقاذ الكعبه دي لما جات الناس هججت في الشوارع و الاولاد مشو الدفاع الشعبي و البنات مشو اخوات نسيبه و النساء عملو صيوانات و عملو زاد المجاهد شعيرية بالمكنه و بصله و قرقوش...
الناس بكو و هللو في برنامج ساحات الفداء و اتعملت أعراس الشهيد و الناس كبرت و هللت... فجأة بقى فلان كافر و فلان عميل والناس صدقت برضو... لما اتزنقنا عينا طلعت قالو ده ابتلائات نصبر عليها عشان الفرح قدام و نتايج الثورة مع تقوى الله بتحصل... بس نخلينا مؤمنين بالله و الثورة وكده ?
...و جا بعديها تمكين واستيلاء علي الاقتصاد و استحقاقات العباد... اها الناس الصدقو الكلام ده و مشو وراه ديل كانو ما كلهم كيزان لكن ناس ساي ذيي و ذيكم شالهم الحماس و البروباغاندا القوية وضغط الانداد الا القلة القليلة...
#حنبنيهو
اها ياجماعة حكينا القصة دي ليييه...
عشان نكون واعين و مفتحين عيوننا و مافي زول تاني يسوقنا ساي و ينسينا طلعنا ثورة ليه... ثورة تمنها غالي دم و دموع و حزن و حماس...
مافي زول مقدس... مافي زول سوبر و حلو منزل من السماء... اي زول مهما كان يقبل التصحيح و المراجعة و يتقطع ليه كلامو في وشو لو ما نفع معانا...
مافي تاني كلام فلان كويس لكن الحولو كعبين... عشان فلان ده مسئول من البيجبهم ديل... القصه هنا ما فيها الأعمال بالنيات...
