في دخلة الشتا ناس كتير بتتحمس والبعض بيبقا مقريف،بس في مجموعة (ومش قليلة) بتمر بمشاعر سلبية مع تغير الجو وخوف شديد من التقلب المزاجي اللي هيمرو بيه في عمق الفصل نفسه.

الناس دول تحديدًا هتكلم معاهم في الثريد ده عن حلول؛بصفتي واحدة منهم وبصفتي المهنية كوني عندي خلفية علمية عن ده.

1

في الأول نتفق إن في فرق بين إني مش بحب أجواء الشتا أو مش ده فصلي المفضل وبفضل أنشطة الصيف، عن إني حالتي المزاجية بتسوء جدًا في الشتا وبكون مليء بمشاعر سلبية ومش متحمس لشيء ولا عاوز أعمل حاجة وبفقد ال baseline بتاع نشاطي. ده مهم أوي نبقا فاهمينه.

لأني هنا بكلم المجموعة التانية.

2

طيب لو انت من المجموعة التانية اللي حالتها المزاجية بتسوء فعلًا بوضوح في الشتا وكمان معدلات نشاطك بتقل جدًا لدرجة إن ده ممكن يأثر على مسؤولياتك اليومية خليني أقولك الأول إني قلبي معاك وحاسة بيك وإن اللي بيحصل لك ده له تفسير علمي وموجود وانت مش بتدلع خالص ولا حاجة.

3

في الأساس في ربطة واضحة جدًا علميًا بين التغيرات المناخية والحالة المزاجية للإنسان،وده في الأساس متعلق بتأثير الشمس كحرارة وضوء.

لدرجة إن مرضى الاضطرابات المزاجية بيكونو عارفين إن في مواسم مهم جدًا يراجعو فيها الطبيب النفسي عشان يعملو إجرائات وقائية من نوبة اضطراب مزاجي محتملة.

4

بناء على ده، تم اكتشاف نوع من أنواع الاضطرابات المزاجية(لأن هم كتير جدًا)اسمه اضطراب المزاج الموسمي، واللي في الأساس بيحصل في دخلة الشتا وبيكمل فيها.

وعشان أقول اضطراب،لازم يبقا في عطلة.. يعني ايه عطلة؟ يعني وجه أو أكتر من أوجه حياتي متعطل بوضوح.

الاجتماعي، العملي، العلمي.. إلخ

5