ده ثريد بعنوان "انا كنت غلطان"

انا دايما مقتنع ان المفروض محدش يبقى متيقن من رأيه لأن أي رأي ممكن يطلع غلط بل أن حتى لو الرأي مثبتش انه غلط او صح فانت شخصيا ممكن تغيره لما الزمن يعدي وتفكيرك يختلف او معرفتك تختلف

فانا هنا هكتب شوية حاجات انا اقتنعت مع الوقت اني كنت غلطان فيها 1️⃣

كنت غلطان لما زمان نتيجة الحماس لخناقة ميسي رونالدو اني استهنت برونالدو، تخيلت ان لمجرد تسجيله اهداف بدون مشاركة اكبر في سير اللعب فهو مش لاعب عظيم كفاية وان لازم يبقى لك مشاركة كبيرة والا متبقاش لاعب مستوى اول، ليه غلطان؟ لأني استهنت بفكرة التسجيل نفسها وغزارتها وتوقيتها 2️⃣

لما عدى الزمن وشفت لاعيبة كتير بيضيعوا فرص كتير او بيسجلوا لكن بيضيعوا في الماتشات الكبيرة او بتحس في اوقات ان الحدث اكبر منهم عرفت ان اللي بيعمله رونالدو شئ مش سهل ولا هين ابدا واني كنت غلطان اني في وقت ما زمان اخدته for granted

3️⃣

كنت غلطان لما حملت كل مشاكل فرقة برشلونة لفالفيردي، مش لأني اكتشفت انه مدرب عظيم، لأ، هو مش مدرب بحجم برشلونة واسلوب الكرة اللي انتهجه كان النقيض لكل ما يمثله برشلونة ودي حاجات انا لسه مقتنع بيها لكن في نفس الوقت انا تجاهلت عنصر مهم جدا في المعادلة مكانش المفروض اتجاهله 4️⃣

ان الراجل معاه في الفريق لاعيبة غير قابلين انك تطوعهم تكتيكيا وفي نفس الوقت انت اضعف من انك تحرمهم من المشاركة، فالفيردي مش مسؤول لوحده عن اللي حصل، فالفيردي مش مدرب عظيم ولا مدرب لبرشلونة لكن مش بالسوء اللي تخيلته، او بمعنى ادق، مش معنى انه مش مدرب عظيم انه مدرب سئ في المطلق 5️⃣