لما بديت أختار السكن لرحلة العلا، كانت تميل نفسي لاختيار شي جديد وما سبق لي تجربته من قبل. لهذا السبب، كان خيار Caravan by Habitas AlUla مغري بشدة.

فكرة المكان بكل بساطة هي عبارة عن ٤٥ كرافان بعضها مطل على مزارع نخيل والبعض الآخر. مواجه للجبال في وادي عشار. الكرافانات ما تحتوي على أي أدوات ترفيه (ما عدى نسخة من رواية الخيميائي عند السرير في كل كرافان)، وهذا شي متعمد حتى يجبرونك تطلع في أوقات فراغك من الكرافان وتتوجه للمنطقة اللي في المنتصف والمحتوية على خيمتين وجلسات مفتوحة، وهذي باشرح لكم فكرتها في الثريد أدناه.

الحين خلونا نتكلم عن الكرافانات نفسها..

أشهر شركة كرافانات في العالم اسمها Airstream، وهي شركة أمريكية بدأت في انتاج هذا النوع من الكرافانات من هيكل مصنوع من الألمنيوم في الثلاثينات من القرن الماضي. وكاتلوجهم اليوم يحتوي على موديلات متنوعة وأحجام متعددة، وأحدها النوع هذا اللي في العلا اللي يبدأ سعر المقطورة الواحدة منه من ١١٠ ألف دولار.

أضافوا على الكرفان دكّة صغيرة مواجهة لمزرعة النخيل (الڤيو في الصورة الأخيرة)، والجلسة فيه جميلة جداً خصوصاً في الليل.

أجمل ما في المكان الإضافات اللي تحصل عليها بحجزك هنا.

أول نقطة عندك في المنطقة اللي في المنتصف هي الخيمة الكبيرة، وهذي فيها جلسات كثيرة وتنس طاولة و board games والهدف منها تكون مكان تجمع لكل سكان الكرافانات وتختلط معهم وتتعرف على ناس جديدة.

الخيمة الصغيرة هي مكان الأكل، وهنا تقدر تطلب الفطور المشمول مع قيمة السكن، ويجي عبارة عن منيو تطلب منها. أكثر شي أعجبني في المنيو الـ açaí bowl كان لذيذ!

وفيه جلستين خارجيات، واحدة يتوسطها مشب، والثانية تقدر تطلب فيها شيشة، ويجي مقابلها أكثر من فود ترك تقدم قهوة / آيسكريم / بيتزا.

فيه فعاليات كثيرة ينظمونها Habitas هنا، وتشمل yoga and meditation وشي ثاني اسمه canyon sound bath اللي بكل صراحة ما أدري وش يكون بالضبط وما تجرأت أسأل :)

فيه شي ثاني غريب وملفت للانتباه، كل يوم الساعة ٨:٠٠ بالليل يسوون اجتماع سينمائي في منطقة قريبة من الاستقبال يشغلون فيها فيلم على بروجيكتور مسلّط على سفح الجبل مباشرة، وفيه جلسات ارضية مباشرة قدام الجبل. ما سبق وشفت شي زي كذا من قبل، لكن للأسف ما ضبطت معي ولا صورة له.

من الداخل، الكرافان فيه جلسة في الطرف اللي من ناحية الباب، و"غرفة" نوم في الطرف المقابل، وهنا أنا قاعد استعمل مفردة "غرفة" بطريقة فضفاضة جداً. المنطقة هذي عبارة عن سريرين (وفيه كرافانات تجي بسرير واحد) وممكن عزلها عن بقية الكرفان بستارة.

فيه منطقة مطبخ مزودة بثلاجة ومايكرويف (بس بدون غلاية أو مكينة قهوة). والميني بار فيه مشروبات متنوعة وسناكات.

الكرافان فيه شاور، وضغط الماء لا بأس فيه، لكن الحمام -أعزكم الله- كان أسوأ ما في تجربة السكن هنا. فإذا تبي تحجز عندهم حط ببالك إن هذي النقطة تتطلب منك خفض سقف توقعاتك بشكل كبير جداً.

السلبية الثانية اللي لازم تنتبه لها هي ان تنقلك داخل السكن يكون اما مشي أو بدراجات أو بطلب golf cart من الاستقبال. نظراً لعدد الكرافانات مقارنة بعدد الموظفين اللي على الـ golf carts … وقت انتظارك لها ممكن يكون طويل (قد يمتد إلى ٤٥ دقيقة في بعض الأحيان)، خاصة لما تكون لابس ثوب شتوي وما تبي الغبرة تحوسك في المشي إلى منطقة الاستقبال.