نحن مين؟ نحن شو؟ نحن شو بدنا؟ نحن اللي بدنا اياه كيف منوصلو؟ ولنوصلو شو ناقصنا؟. نحن شعب منيح؟ أم عالة عالكوكب؟ افترضو انقرضنا بصير شي للموكب؟ شو اضافتنا للحضارة (بلا شعارات الحضارات والفوارغ والاشعاع)؟ يعني شو الفن الهندسي تبعنا مثلا؟ كيف زراعتنا؟ شو مشغولاتنا اليدوية؟ عاداتنا؟
نحن شو؟ بتروح عبلد بتلاقي عندو أنواع مميزة من الخشبيات او النحاسيات او الفخاريات. بتلاقي البندورة مثلا عندهم نازلة متل العنب. بتلاقي بطيخ مربع. بيصنعو سامسونج أو مرسيدس أو يا اخي بطلعو بترول أو بيرقصوا باليه أو عندهم سوق مالي أو عندهم جسور بتربط آسيا بأوروبا
طيب بتبرم بالبشر بتلاقي متاحف عامرة، سينما مسرح عامر، برامج هادفة وغيؤ هادفة مش متل عنا كلو مستورد وسخيف ومنعمل همروجة تافهة عشانو، نحن شو؟ ولك بلاد ما عندها ربع آثارنا عملت ايام لبتراث ونحن عنا العالم القديم كلو تحتنا مضيعينو. نحن مين؟!
نحن مين مفكرين حالنا؟منضل نهيص لدكتور ومهندس وصحافي وفنان أبدع ولاعي رياض ورجل اعمال أبدعو، شي مرة سألنا ليه ابدعو برا لبنان؟ ليه زعيمنا بعلم ولادو برا لبنان؟ ليه زعيمنا ييتحكم برا لبنان؟ ولك نحن مين؟! شو بدنا ؟مين بدو منا؟! اي متى منعرف ليه ما منزرع جوز بس منحب الجوز والزبيب!.
ولو أي متى منعمل صابون من شجر غارنا حاج مهتري وما النا خلق، ولو اي متى منصنع دولاب بسكليت ونركبها بقساطل!، ولو اي متى بدنا نعمل مسرح حقيقي ونكتب من جديد الصبي الأعرج وأحاديث القرية وأجنحة متكسرة من جديد؟!. ولو أي متى منخيط تيابنا ومنفتخر فيها؟! نحن شو؟ نحن مين؟أي رب بدو يتحملنا؟!
