♨️جزء من المعلومات التى وعدت حضراتكم بنشرها♨️

بعد 25 يناير كان كثير من اجهزة المخابرات الدوليه نشط فى مصر وكان من ضمنهم بطبيعة الحال المخابرات الإيرانية .. وحصل محاولات كتير لتجنيد اعداد كبيره من الشباب المصرى انا كنت واحد من ضمنهم .. قبل 25 يناير انا كنت عايش فى سلطنة عمان .

فى وسط تقريباً كله شيعى .. وبطبيعة الحال كانت علاقتى بالشيعة هناك علاقه جيده .. انا راجل يهوى الكتابه والتحليل السياسى وكنت بكتب وانا فى الخليج وبعض الصحف الخليجية والجزائرية كانت بنتشر مقالاتى على فترات متقطعه .. رجعت مصر يوم 30يناير وشاركت فى الثورة زى كتير من الشعب ما شارك .

الفترة دى كان فى ثورة فى مملكة البحرين قايم بيها الشيعه هناك ضد الملك .. الثورة دى كان بيدعمها إخوان مصر وإخوان البحرين فى الخفاء .. مسؤل الإخوان فى البحرين مهندس مصرى أسمه نبيل عبدالقوى جارى فى مصر واعرفه معرفه شخصية واخوه الاصغر زميل دراسه .

وفى الفترة دى كان الإخوان بيبحثوا عن كتُاب وصحفيين مش محسوبين عليهم يدعموا شيعة البحرين .. ويظلوا الاخوان فى الخفاء حتى تنجح الثورة هناك .. اتصل بيا عضو مجلس شورى الاخوان دكتور اسمه مجدى قرشم وشرحلى الوضع .. وانا اتحركت بدافع إنسانى وبديت اكتب وادعم ثورة البحرين .

وده بطبيعة الحال لفت نظر شيعة البحرين وشيعة مصر تجاهى وبالتأكيد كمان لفت نظر المخابرات الإيرانية اللى كان من السهولة انها تثق فيا بحكم سبع سنوات عشتها فى سلطنة عمان وسط الشيعه هناك .. وبالفعل بدأوا الإتصال بيا عن طريق نشطاء ورجال أعمال من مملكة البحرين بالتنسيق مع شيعى مصرى .