اهم حاجة في اي نظام غذائي:
انت بتاكل ايه.
ده اهم من كل حاجة، اهم من انت بتاكل قد ايه واهم من انت بتاكل كام مرة في اليوم واهم من انت بتاكل كام ساعة في اليوم.
ليه؟
انت بتاكل ايه؟ ده اللي بيحدد كل الحاجات التانية.
مثلا تخيل لو انت في مكان مش متوفر فيه اكل غير بيض وخضار او لحمة وشوربة او سلمون وسلطة.
لو ده الاكل الوحيد المتوفر هاتلاقي نفسك بقيت تعمل كل الحاجات التانية من غير ما تفكر.
هاتلاقي نفسك لوحدك بطلت سناكس عشان مفيش حد هاياخد سناك لحمة ولا خضار ولا سلطة، هاتلاقي نفسك بدأت تشبع عشان الاكل ده بيشبع جدا، هاتلاقي نفسك عملت صيام متقطع لوحدك، عشان الاكل ده مش هايخليك تبقي قادر اصلا تاكل ٥ مرات في اليوم.
هاتلاقي نفسك كمان قللت اكلك لان احتمالية انك تاكل كتير من الاكل ده اقل من احتمالية الاكل الكتير من اي اكلة تانية.
يعني بغض النظر انت شايف ايه اهم حاجة عشان تخس، سواء الصيام او تقليل الاكل او منع السناكس، انت هاتلاقي نفسك عملت التلاتة من غير اصلا ما تقصد لو غيرت نوع الاكل.
ده معناه ان اي نظام هايحكمك في نوع الاكل هاتشوف فيه نتيجة كويسة لانه هايأثر علي كل حاجة تانية.
الاكل الطبيعي، الاكل اللي مش مخفف، الاكل العالي البروتين هايخليك تعمل كل اللي المفروض تعمله عشان تخس من غير ما تقصد تعمل حاجة.
اهم حاجة في اي نظام انت بتاكل ايه.
