ثريد سريع بالنسبة لاحداث راس السنة:

الثورة خربت تصورات الشباب عن "الإنسان" و عن انو ممكن يكون زول كعب، يتحرش و يغتصب و ينهب..الخ/ الثورة في كل العالم وضع استثنائي بتخلق درجة تضامن و فضيلة عالية.. بعد تنتهي بيرجع الانسان لي طبيعته كزول عنده القابليتين؛ قابلية خير و قابلية شر

الظروف المحيطة هي البتغذّي وحدة من القابليتين ديل، سواء قابلية الخير او الشر .. الزمان، المكان، الجو العام.. عشان كدا دروكايم قال انو الزول في نص المجموعة/الجماهير/القطيع و في ظرف معين = ممكن يتصرف تصرفات ما بيتصرفها لو هو براه او بتكون قابليته ليها قليلة.. نفس الناس الكانوا في-

-الثورة و الاعتصام بدافعوا عن و بحموا البنات و ما بتحرشوا بيهم..الخ هم نفسهم الممكن خلال ظرف رأس السنة يتحرشوا و يغتصبوا..الخ لانو ببساطة قعد في نص جو عام بغذّي القابلية الكعبة عنده و ما قاومها.

من اشهر تجارب علم النفس و اللي هي تجربة سجن استانفورد المعروفة، حيث وضعوا متطوعين-

-سجّانين و سجناء في ظروف سجن، و قالوا للسجانين يتصرفوا كسجنانين حقيقين و للسجناء كسجناء حقيقيين..و النتيجة انو السجانين اللي هم كانوا مواطنين عاديين في الحقيقة عملوا حاجات اكتر و اشد و أقسى من المتوقع و ألّفوا انواع تعذيب من عندهم و كانوا بيتلذذوا بالحاجة دي لحدي ما اضطر الدكتور-

-صاحب التجربة لإيقافها.

فهنا دا انسان عادي اتوفرت ليو ظروف سلطة مطلقة و جو انعدام رقابة و مسؤولية= مما أطلق قابليته الشريرة.

على ضوء الحاجة دي بنقدر نفهم كيف 30 امنجي يقتلوا احمد الخير تعذيباً، رغم انو ماف زول فيهم بكون عنده معاه مشكلة شخصية لكن دا تماهي مع الجو و الظروف-