اللوحة دي ليها قصة عجيبة معايا . كنت في بداية شبابي في اسكندرية باقرا احيانا في الفن التشكيلي واروح معارض اتفرج وانا ساكت وامشي . ماكانش فيه من اصحابي فنانين تشكيليين زي بعد كدا . كنت كل ما اقرا الاقي حديث كتير عن المدرسة التاثيرية او الانطباعية اللي ظهرت في فرنسا https://t.co/d5Qpu8McXH

في منتصف القرن التسع عشر التي كانت نقلة في تاريخ الفن وجعلت من اثر الشمس والفضاء علي تكوين اللوحة والشخصيات منهجا وخرجت من الواقعية . كتير قرات عن التاثيريين بالصدفة اكتر من غيرهم واشتقت جدا اشوف لهم اي لوحة في مصر وماحصلش للاسف يمكن قصور مني ماسالتش مين اقتني لوحة من لوحاتهم

صور اللوحة دي ولوحات تانية كتير في الكتب سواء لادوارد مانيه صاحب اللوحة او كلود مونيه اللي خدوا اسم الحركة من لوحته "انطباع شروق الشمس " او لرينوار او ديجا من اللي سموهم مابعد التاثيرية كانت صور وحشة سواء ملونة او ابيض واسود فكنت اقرا ومش شايف حاجة من اللي بيقوله الكلام .

المهم رحت باريس اول مرة سنة 1992 وسالت فين الاقي لوحات التاثيريين قالوا لي في متحف الاورسيه . عرفته فين والصبح بدري رحته ودخلت . طلعت الدور التاني ودخلت صالة كبيرة فيها لوحاتهم . الحقيقة تجمدت علي بابها لان في الواجهة البعيدة كانت هذه اللوحة علي الحائط حتنطق قدامي

تجمدت ولا ادري كيف سقطت دمعة من عيني زي اللي شاف حلم ماكانش مصدق انه حيشوفه ابدا . ومشيت بالراحة قربت منها ووقفت قدامها مندهشا من الرجلين المشغولين والمراتين التي تتصدر واحدة منهما المشهد عارية والاخري بعيدة ولا ينتبه اليهما الرجلان تحت ضوء الشمس ولفيت القسم كله شفت فنانيه