فى سنة 2016 ابوي "الله يرحمه” وقع وكسر مفصل المخروقة،انا كنت خارج السودان ورجعت بعد الحادث بيومين ،لقيته منوم فى المستشفي فى بورتسودان ،اخصائي جراحة العظام حدد ليه العملية بعد يومين.

فى اليوم المحدد منتظرين يبدأوا فى الاجراءات مافي زول جانا ،اليوم انتهي وسألت ادارة المستشفى

قالوا لي الدكتور طلب تأجيل العملية ?، قلت من غير مايكلمنا ؟

اتصلت عليه ورد علي انو حيجيني بعد ماينتهي من العيادة !!

جاء المساء متأخر واعتذر انو ماكلمنا بالتأجيل لأنو هو لأخر لحظة كان متوقع انو العملية تتعمل بس الاخرو انو فى اخصائية تخدير هو بيشتغل معاها يومها كان مشغول عمليات

اليوم داك كان يوم ثلاثاء ادانا مواعيد الخميس وبرضو تكرر نفس السيناريو تأجيل والمرة دى الحجة جديدة،قال لي ابوك دا عنده هيستوري بتاع سكري وضغط وجاتو جلطة قبل خمسة سنوات وانا خايف ولازم اعمل كل إحتياطات ممكنة ،فى الوقت داك ابوي كان بيتألم شديد بس هو كان صبور ومابحسسنا بأي شئ

ظهر ليه ارتفاع فى كريات الدم البيضاء بسبب التهاب وقعدوا يدوه فى مضادات حيوية ودى كانت حجة جديدة انو لو مانزل مستوي الالتهاب هو مابقدر يدخلو العملية !!

بعد تلاتة ايام استجاب للعلاج والالتهاب راح،حددنا لينا العملية بعد يومين وطلب مننا انو ننقلوا مستشفي العشي بتاع حوادث العظام

بعد يوم من دخولنا مستشفي العشي،بدأ اضراب الاطباء الشهير فى 6 اكتوبر 2016 (إستمر اسبوعين)،اخصائية التخدير رفضت العمل وقالت هي ملتزمة بالاضراب مع زملاؤها فى النقابة.

اخصائي جراحة العظام مصر انو مافي زول يشتغل التخدير غيرها هي !!!

تلفونات ووساطات وتدخل جهات ومعارف ولاحياة لمن تنادي