شايف في كم رسالة واتساب حايمة و بادية بشعارات رنانة من مثل: عاجل و بروتوكول علاج الكورونا و طلس
اخطر مافي الموضوع انو ذاكرين فيها انو مفروض يتاخد الازيثرومايسين مع الكلوريكين ولا الهايدروكسي كلوريكين
خطورة الموضوع في انو الازيثرومايسين لمن يتاخد سوا مع الكلوريكين ولا الهايدروكسي كلوريكين ممكن يعمل عدم انتظام في ضربات القلب و الزول يموت، عشان كدا حتى في بداية مرض الكورونا لمن العيانين كانو بيدوهم الأدوية دي كانو بيعملو ليهم تخطيط قلب و بيتابعوهم عشان ما يموتو بمضاعفات العلاج
اول ما الامريكان المرض ظهر عندهم ترمب طلع قاليهم انو الهايدروكسي كلوريكين هو العلاج السحري و الامريكان جرو اخدوهو و كتير منهم مات بالدوا.
ما تاخدو أدوية مكتوبة في رسالة واتساب بيكون كتبها جاهل كوعو من بوعو ما عارفو
علاج الكورونا بيبدا من الوقاية منها:
تبعد من التجمعات
تغسل يدينك طوالي لمدة عشرين ثانية على الاقل باي نوع صابون
لو طلعت برا البيت لضرورة قصوى و طول ما انت برا حاول ما تلمس خشمك او نخرتك او عيونك و خليك لابس كمامة،
الكمامة ما تصلحها لو نزلت بانك ترفعها من نخرتك و لكن حاول صلحها بالجمبات و لو في طريقة احسن تغسل يدينك بصابون او تمسحهم بمعقم و بعداك تصلحها
بعد تجي البيت اول شي تعملو و قبل اي شي تغسل يدينك كويس
لمن تقلع الكمامة اقلعها من غير ما تهبش نخرتك او خشمك، اقلعها من حتت الاضنين
