هاكتب تحت التويتة دي جمل لاي أم جديدة، او هتكون أم.
بعيدا عن خزعبلات المجتمع وأفورة طنطات حكماء صهيون، عن تجربتي الشخصية.
-الاغلب بيقولك لما تولدي هتعرفي ان الحمل احسن وتقولي ياريتني.
مش حقيقي تماما، ان الطفل يبدأ يبقي كائن مستقل عنك احسن وأفضل مليون مرة من انه جزء من جسمك وحرفيا بيتغذي عليكي.
-يقولوا خلاص انسي بقي حياتك، مش حقيقي.
أصعب فترة اول فترة، بيجيلك احساس ان حياتك خلاص انتهت، وهتعيشي ايامك كلها ترضعي وتغيري بامبرز وتعملي تمارين المغص، وتنامي ١٠ دقايق كل ٥ ساعات،بس والله الدنيا بتتحسن، هتنامي وهتعرفي تعملي ايا كان ما بتحبي تعمليه، تقرأي كتاب او تشوفي فيلم.
مفيش حاجة اسمها طالما خلفتي خلاص، ده وهم المجتمع بيخلقه وعايز الست تعيش فيه زي ما امهاتنا عاشت فيه.
من حقك يكون ليكي وقت خاص بيكي، ويكون ليكي مشروعك الي بتشتغلي فيه، ويكون ليكي كيان ووجود بعيد عن ابنك او بنتك، وده ملوش علاقة بالحب تماما.
الطفل بعد ما بيتولد يتقص الحبل السري الواقعي، لكن لسه في حبل سري تاني مخفي لسه موجود، علشان كدة الطفل بيفضل متمسك بامه طول الوقت في الفترة الاولي، ميعرفش غيرها وهي الحياة بالنسبة له.
كل ما بيكبروا كل ما بيبقوا عايزين يستقلوا، كل فترة ولها ظروفها. وكله بيعدي.
