- متجرك جديد وما عرفت تطلع ولا بيعة ؟

#ثريد دسم، مخصص لأصحاب المتاجر الجديدة اللي ما حققت ولا بيعة ..

بإذن الله سيكون دليلك المرجعي لتحقيق بيعتك الأولى ..

فضلها وتابع وأنت رايق ومعك كوب شاهي أو قهوة ..

حياك تابع معي ..

@mkt_chess

طيب .. قبل ما نبدأ !

1- راح افترض أنك تعرف ابجديات التحليل البسيييط على تحليلات قوقل بدون تعمق

2- راح افترض أنك تعرف تتعامل مع منصة search consol بدون تعمق

اذا انت ما تعرف لـ 1 و 2 تراها بسيطة يكفي انك تبحث عنها في اليوتيوب وتاخذ فكرة عنها ..

انا يكفيني منك المعرفة البسيطة .

ممتاز .. بسم الله نبدأ الجد

أولاً : معدل الارتداد

من إحصاءات قوقل ابيك تشوف معدل ارتداد متجرك كم في المية خلال اخر 30 يوم ؟

اذا كان متجرك جديد طبيعي ان يكون معدل الارتداد مرتفع 80% او 90% ..

هو يكون مرتفع اذا كان فوق الـ 60% .. وبشكل بسيط راح اشرح لك وشو معدل الارتداد

خلني ابسطها لك بدون تعقيد ..

حلو ..

لو أنت رحت لمطعم .. وأول ما دخلت الا والله ريحة شييينة مرة ?..

لحظتها وش بتكون ردت فعلك ?؟

✅صح عليك .. التصرف الطبيعي انك تطلع على طول بدون نقاش ..

طلوع الناس من المطعم اول ما يدخلون يدل ان فيه شي مهوب كويس في المطعم ..

هذا نسميه في المواقع معدل ارتداد مرتفع ..

والعكس صحيح

لو المطعم تمام وديكوراته حلوه والاضاءة رايقة اكيد انك بتجلس ( أطول ) مدة ممكنة !

هذا نسميه معدل ارتداد منخفض ..