بما أن سنة الامتياز خلصت تقريبا وكانت الحمد لله سنة سلسة مع صعوبة الظروف الي صارت ، و قدرت فيها بفضل الله اوصل للتخصص الي ابغاه و احقق درجة عالية ب SMLE حبيت اسوي ثريد فيه نصائح محد تطرق لها وغير مكررة وتفيد المقبلين على الامتياز عموما #سنة_الامتياز

١- حاول ما تبدأ الامتياز الا وانت حاط ببالك على الاقل ايش مجال تخصصك المستقبلي ؟ جراحي ولا مديسن ؟ على أساسها ترتب وتختار المسار ، اذا لسى محتار مو غلط ابدا لكن حاول تجربهم كلهم ببداية الامتياز وخصوصا التخصصات الجراحية ، لان الي كنا نسويه واحنا طلاب مختلف تماما عن دورنا الحقيقي

مثلا : اذا تشوف عندك رغبة بتخصص جراحي وتخصص آخر مديسن ، حاول تجربهم أول ثلاثة شهور وتجرب التخصص الجراحي اول ، لان تجربتنا واحنا طلاب مختلفة تماما ، ممكن تخصص وانت طالب يستهويك ، لكن التجربة الحقيقية مختلفة ، فبالتالي اذا ما اعجبك الوضع يمدي تلاحق على نفسك وترتب رغباتك من جديد.

٢- اذا اعجبك تخصص ما ، حاول تجربه بكذا مكان وما تحرم نفسك من الفرص الي ممكن تجيك ، كل مركز وله سلبيات وايجابيات ، ممكن السلبيات الموجودة فيه بالنسبه لك ايجابيات ، دايم عزز فرصك وجرب اكبر قدر من المراكز بالتخصص الي تبيه ، تاخذ سمعه كويسه ووقت ترتيب السناتر تقدر تقرر وانت مرتاح

وقت تجربتك للمراكز : حاول تشتغل مثل ما يشتغلون الريزدنت الي هناك ، عشان تكون التجربة فعلية ، حاول الدكاترة الي موجودين هناك يعرفونك وتاخذ recommendation منهم اذا تقدر ، حاول تجتهد وتبذل كل ما عندك سمعتك توصل وتتناقل بينهم وانت ما تدري وهالشيء يفيدك بالمقابله بعدين .