قررت أعمل ثريد عن طريقة إختيار العربية المناسبة ليك من وجهة نظري المتواضعة بعد ما ناس كتير سألتني، هتكلم فيه عن العربيات والتوكيلات والمواتير

الثريد هيكون مفتوح وهزود عليه كل ما ألاقي خاجة جديدة ظهرت في الأسئلة

أول حاجة مفيش عربية كويسة ١٠٠% وعربية سيئة ١٠٠%

كل عربية في الدنيا ليها مميزاتها وعيوبها

كمثال ال فيات ال ١٢٨ موديل ١٩٨٤ هتلاقي فيها مميزات عن ال مرسيدس C180 موديل ٢٠٢١

زي إن قطع غيارها متوفرة ورخيصة وأي ميكانيكي ممكن يشتغل فيها، وده مهم جدا عند ناس كتير وفي ظروف تشغيل معينة

أول حاجة تعملها إنك تكتب لستة بكل اللي ممكن تتخيله من نقط مهمة بالنسبة لك عن العربية، كمثال

1. المصنع
2. سمعة العربية نفسها
3. الوكيل في البلد اللي هتستخدمها فيها
4. سمعة العربية في البلد اللي هتستخدمها فيها
5. القوة بالحصان
6. السعر
7. الشكل الخارجي
8. الشكل الداخلي
9. حبك ليها

١٠. توفر قطع الغيار

10. الضمان
11. سهولة البيع
12. سهولة الصيانة بعد فترة الضمان
13. تقبل التجار ليها

النقط دي على سبيل المثال وليس الحصر، ممكن تزود النقط الخاصة بيك وبطبيعة إستخدامك للعربية

هبتدي أتكلم عن كل نقطة في تويتة أو أكتر علشان ندخل في التفاصيل

المهم إنك بعد ما تكتب النقط كلها تدي لكل نقطة رقم وتضرب كل رقم في وزنة من وجهة نظرك

يعني واحد بيعشق نوع معين من العربيات زي مثلا لاندروفر ديفيندر موديلات التسعينات مش هيشتريها علشان إعتمادية ولا علشان سعر إعادة البيع، ده لازم يدي وزن كبير لحبه ليها ويبقى فاهم كده