- بلادي وان جارت علي عزيزة

* عزيزة مين يا حيلتها؟

• واهلى وان ضنوا علي كرام

* يا راجل بقى انت مقتنع بالكلام ده؟ لو اهلك عملوا كدة يبقوا زبالة

• بلاش طيب متزعلش ... خد الحتة دي: بلاد العرب اوطاني https://t.co/s3OwWHbQWq

* يا عمى اوطانك ايه وكلام فارغ ايه؟ بلاد الغرب اوطاني، لا عندهم كفيل ولا حد يقدر يسحب جواز سفرك ولا حد يقدر يفنشك عشان مش عاجبه شكلك

• طيب ماشربتش من نيلها؟

* شربت من كيعاني، وعلى فكرة المية مقطوعة في المنطقة عندنا من 3 أيام

• طيب بذمتك ماجربتش تغنيلها؟

* انت شكلك كدة بتغني عليا ... كفاية علينا إذاعة الاغاني

• يا راجل ما يصحش، مصر برضو هي أمك ونيلها هو دمك

* لا بقى، لغاية هنا واقف، انا ماحبش حد يجيب سيرة امي لمؤاخذة. أما نيلها هو دمي ده موضوع كبير ... شكلها كدة إثيوبيا هتنشف دمنا كلنا يا صاحبي.

- بس انا برضو شايف نهضة كبرى ... من حلوان لشبرا

* ياااه دة انت باين عليك دقة قديمة من أيام الأستاذ عبد اللطيف التلباني. الحاجة والوحيدة اللي بتربط حلوان وشبرا دلوقتي هي المترو والناس في المترو بقت عرقانة وريحتها وحشة ... بيوفروا مية!

- ايه التشاؤم اللي انت فيه ده؟ اضحك بقى وافردها يا عم

* الضحك بقى عزيز اليومين دول يا صاحبي. الناس بقت محتاجة وابور زلط يعدي على وشها عشان يتفرد.

• بس انت ظروفك حلوة: ماشية معاك آخر حلاوة