#ثريد

اللى ربى ذوقى وحسى الفنى زمان هى الدولة..عن طريق ماسبيرو - رحمه الله.

زمان كنت بتفرج دايما على الآتى:

• برنامج الموسيقى العربية - د. رتيبة الحفنى.
• برنامج عالم الموسيقى - د. سمحة الخولى.
• برنامج فن الباليه - مش فاكر مين كان بيقدمه.
• إذاعة أم كلثوم.
• البرنامج الموسيقى.

+

البرامج دى شكلت وجدانى فى فترة مبكرة جدا..

قبل الفيديو ما يظهر..بابا الله يرحمه كان مثلا مسجل فيلم لعبة الست علي شريط كاسيت كنا نقعد نسمعه..

مثلا كان مسجل اغنية فاتت جنبنا ليلة اذاعتها أول مرة..كنت بصحى على صوت حليم كل جمعة وهو بيقول مرة تانية برضه صدفة...

+

للأسف كل البرامج دى اختفت وأصحابها العظام توفوا - رحمهم الله.

وفى نفس الوقت كان بين كل حين وحين يظهر شريط كاسيت ممنوع ومتصادر..اللى افتكره منهم كان شريط قيل وقتها أنه للراقصة سحر حمدى..

لما اخويا الكبير جابه البيت وشغله..أنا أوتوماتيك قلتله إيه القرف ده..!!!!

+

كنت طول ما انا ماشى فى إيد ماما وأنا صغير..ماكنتش بشبط فى شيكولاته ولا بسكوت..كنت بفضل أدور على بياعين القلل لأن بيبقى عندهم طُبَل صغيرة..وكنت أتشال وأتحط عشان تجيبلى طبلة..

كنت صغير لسه معرفش ولا شفت فين محلات بيع الآلات الموسيقية...

+

فى ابتدائى..قرينا ميكى وتان تان وسوبر مان..كبرنا شوية قرينا ألغاز محمود سالم الله يرحمه..

كبرنا أكثر دخلنا على أنيس منصور والحكيم ومصطفى محمود ...الخ

بعد كده كل واحد حدد اتجاهه الثقافى ومشى فيه..

+