ارجوكم اقراو الثريد دة كويس لانة بيلخص مشاكل مصر الهيكلية واية الحل والثريد مش سياسى لكنة اقتصادى ولكن الحل للاسف سياسى مش اقتصادى ؟ اية اللغز دة ? معلش استحملنى شوية وهاتفهم ، المشكلة مش نقص دولارات او حرب اوكرانيا او كوفيد ١٩ خالص ، انت مشكلتك ان هيكل الاقتصاد بتاعك مشوة ضعيف
يعنى اية ببساطة اقتصادك هش فبيتاثر باى مشكلة دولية او اقليمية لية لانك بلد لاتصنع ولاتزرع بمايكفى استهلالك شعبك فهاتبقى تحت ضغط اى مشكلة دولية او محلية لان الدولار بالنسبة لك حياة او موت ( العملة الاجنبية عموما مش دولار بالذات ) مثال بسيط انت رب اسرة ونفقات اسرتك الشهرية ١٠ الف
جنية ودخلك ٣ الف جنية فهاتفضل تستلف لكن للاسف انت رجل سفية وبتصرف الفلوس دى فى حاجات مش بتعالج التشوة الاساسى فى دخلك يعنى مش بتزود دخلك جنية وبنفس الوقت لازم تسدد جزء من القروض دى من نفس ال٣ الاف جنية فمش مكفية فتروح مقترض تانى علشان تعوض النقص وتسدد جزء من القرض القديم
علشان الناس الى بتستلف منهم يظلو واثقين فيك ويسلفوك تانى ومصر بتدور فى الدايرة المفرغة دى وساعات بتوصل لمرحلة ان قرض يتاخر شوية فتتبهدل وماتعرفش تعمل اية فتحط قيود عالانفاق مهما كانت النتيجة على امل ان الازمة تعدى بس عمرها ماهاتعدى والقروض الحديدة هاتسدد بها القديم وتصرف شوية
طيب اية الحل علشان تخرج من الدايرة دى ياعم ، الحل الوحيد ان يجيلك حاجة اسمها استثمار اجنبى شركات عالمية زى تويوتا مثلا وسامسونج ومرسيدس وتاتا وغيرهم ويفتحو مصانع عندك ويجيبو معاهم تكنولوجيا وتحقق توظيف للشباب بخلاف الضرايب الكبيرة الى هاتاخدها وكمان هاتبطل تستورد عربيات ومواتير
