مساء الخير...

حبيت أشارك معاكم سلسله للصديق الدكتور علاء حموده عن "الخلافه"

و عايز اسأل الشباب اللي كانوا بينضم للإخوان وقتها أو بيروح داعش أو بيدور على حلم الخلافة.. "يعني إيه خلافة بالضبط؟".

من أول خطوة وقبل ما نتكلم في فكرة "الخلافة" نفسها.. لازم نعرف إنها - كمعظم الأحكام - مختلف في تفسير معناها والمقصود منها.

البعض قال لنا هي "استخلاف قائد مسلم على الدولة الإسلامية".. والبعض قال "لأ.. لا يشترط أن الدولة تكون إسلامية"..

وناس قالت "المهم بيحكم البلاد مسلم.. فيبقى خليفة بشرط.. إنها تمشي بالشريعة الإسلامية".

البعض توسع أوي في مفهومها.. واعتبرها امتداد للنبوة نفسها.. ودا اللي عليه العامة النهاردة.. لو انتقدت أى فعل لأي خليفة من الخلفاء النهاردة الناس بترد عليك باعتبار أن الخليفة امتداد للنبي..

وإن أفعاله مقدسة لا تناقش.. رغم إن دا مش فقه أهل السنة.. دا مذهب بعض فرق الشيعة.. اللي نفس الناس.. بتشتمها طيلة الوقت.

تفسيرات متشعبة.. واجتهادات.. وفرق كتير. وكل فريق له فقهه وأحاديثه اللي بيستند إليها.

محتاجين النهاردة نسافر عبر الزمن إلى العام 632 ميلادية.. يوم الثامن من يونيو.. القرن السابع الميلادي.

يوم وفاة الرسول ﷺ.. "أبو القاسم مُحَمَّد بن عبد الله بن عبد المطلب".

بلبلة هائلة بتحصل بين صفوف الصحابة، بلبلة وتوتر وعصبية وشحن، محدش كان متوقعهم..