اكتر نظام بحبو وبخليك تاكل الاخضر واليابس وتستمر في نزول الوزن اسمو: نظام المرونة(نظام 80:20)

يعني 80٪ من الاكل يكون صحي من خضراوات وفواكه وحبوب كاملة وبروتين وغيرو اما 20٪ بتكون من اكل غير صحي من شوكولاتات وشيبس وايس كريم لان مستحيل الواحد يكون زي (الغنماية) اكلو كلو خضار وكدا

لان نفسك بتتشها (ولنفسك عليك حق) غير كدا حالتك النفسية تكون تمام ومرتاح ما حارم نفسك من شي وما حاسس بضغط لان لمن تحرم نفسك حتنزل لكن اول ما تخلي الدايت البتعملو بترجع الوزن النزلتو ويمكن اكتر

كيف تقدرو تحددو ال20٪؟! في كذا طريقة:

• 20٪ يعني حوالي 200-300 سعرة(للناس البحسبو سعرات)

او لمن تشتروا حلاوة او كت كات من ورا اقرو في الجدول كم سعرة

-الناس ال اي شي لازم ميزان ويقيسو بتكون عبارة عن 50 جرام

-اذا انت انسان عاقل بالغ ما لامي في شي 20٪ بتعادل 7-10 ملاعق رز او ملعقتين صغيرات من تحلية سائلة زي مهلبية او كريم كاراميل او قطعة - قطعتين صغار من بسبوسة او كيك

(القطعة بحجم الكف (باطن اليد) مش اليد كلها)

واهم شي لمن تكونو دايرين تحلو تعرفو متين تحلو انا مثلا واغلب المشتركين معاي بقوليهم يحلو طوالي بعد الوجبة ما تقولو لا بنتظر ساعتين اهضم الاكلتو لان في الساعتين ديل هرمون الانسولين بكون لسا في الدم فلمن تحلي بعد الساعتين انت كدا ما بتدي

الانسولين مجال يرجع البيت ينوم وعملية التخزين حتكون شغالة

الطريقة دي بتساعد كتير الناس الساوين دايت واخر الاسبوع بعملو يوم مفتوح (في اليوم دا وجبة وحدة مفتوحة مش اليوم كلو)

مع النظام دا ما حيكون في شي اسمو يوم مفتوح لان انت اصلا قاعد تاكل حلويات اغلب ايامك فما حتحتاج لليوم دا