هو الفسيخ سمك معفن؟

لا طبعا الفسيخ مش سمك معفن

الفسيخ سمك بوري مملح ومجفف

بس قبل م اسمع هيييييييه وكدة تعال بس

الفسيخ فيه سم قاتل

وده مش مجازا ده حرفيا يعني

#ثريد

#ثريد #يومياتطبييةتغذية

طريقة تجفيف وحفظ الفسيخ بتنشط نوع من البكتيريا فيه سم قاتل!

بكتيريا الكوليستريديم بوتيلينيوم بتفرز سم قاتل تحت ظروف معينة، البكتيريا دي موجوده في انواع كتير من السمك بحكم ان بيئتها الطبيعية هي قاع البحار والانهار ولكن البكتريا دى بتتكاثر وبتنشط سميتها فى البيئة اللى مفيهاش اوكسجين (ايوة زى البيئة اللى بنعمل فيها الفيسخ بالضبط ملح السمكة شيلها ف اكياس بدون اوكسجين بعيد عن الضوء )

البوتيوليزم مرض خطير وقاتل بيتنقل عن طريق الاكل المصاب بالبكتيريا المسببة للمرض، البكتيريا دى بتفرز سم بيصيب الجهاز العصبى ويصيب بالشلل (الشلل بيبتدى من فوق لتحت)

البكتيريا دى موجودة عادى ف الحياة وموجودة في مياه البحر ده معناه ان السمكة ممكن تكون اصلا مصابة (السم الناتج عن البكتريا دى بيتأثر بالحرارة وبيتكسر ف درجة حرارة فوق ال 85 لمدة 5 دقايق ف عشان كدة احنا بناكل سمك بورى مشوى عادى ومبنقلقش هو مصاب ولا لا ونفس الكلام ينطبق على باقي انواع الأسماك اللي ممكن تكون مصابة)

المشكلة لو السمكة مصابة او اى من الحاجات اللى بنستخدمها فى تحضير الفسيخ تكون فيها البكتريا دى لأن اول م نقفل على السمك عشان يتحول لفسيخ البكتيريا حتنتعش ف البيئة دى وتطلق السموم

السموم دى لا بتأثر على لون ولا ريحة ولا طعم الفسيخ ف محدش يقدر يكتشف لو الفسيخ ده مصاب ولا سليم

طيب الليمون والبصل والخل ؟؟؟

ملهمش اى تأثير على السم مفيش حاجة تكسر السم ده الا النار

فترة حضانة الجسم للبكتريا من 12 - 36 ساعة لكن الاعراض ممكن تظهر من 6-10 ساعات

الاعراض:

رؤية مزدوجة، زغللة، ريق ناشف وصعوبة ف البلع هنا مفيش هزار جرى على اقرب مركز سموم

الخبر اللطيف ان نسب الوفاه بعد الاصابة كانت زمان 45% دلوقتى النسبة 8% لكن طبيا 8% دى ما زالت نسبة كبيرة ومرعبة

انا عارفة انى نكدت عليكم لكن مفيش دكتور ينفع يقول غير كدة ولو سمحتوا اللى حياكل ابعدوا عن العيال الصغيرة متخاطروش بولادكم والحامل من فضلك الجنين ده ملوش ذنب

ولو مصممين اوي كلوا كميات صغيرة

كل سنة وانتوا بصحة وحلوين ومبسوطين