ثريد إزاى تعمل مطعم جديد (نسخة 2020):

1- مبدأياً هو يا مطعم برجر يا فرايد تشيكن باقى الأكل خلص

2- حط جبنة على الساندوتشات, و على الفراخ, وعلى المنيو, وعلى الستاف, وعلى الكراسى, وعلى الزباين

3- سمى الساندوتشات اسامى إنجلش كرييتيف روشة جداً تحسها جاية من نتفلكس كدة

كأنك بتحضر ماجيستير آداب إنجليزى,بس هاينتهى بيك الأمر لأسامى من كتاب الهاللو (زا مادنيس- زا تشيكن- زا باثرووم)

4- هو نفس الساندوتش بس بنغير الصوصات اللى عليه

5- إكتب على اى حاجة بيف بيكون, حتى لو ساندوتشات بابا غنوج, الجملة دى تقريباً بتزرع رغبة فى اللاوعى بالشرا عند الشباب

6- إعمل نافورة جبنة بقى و دى إختراع مالوش اى ستين لازمة لو جبت طبق طحينة دوبل هايكون أكرم لك

7- إتفق مع صفحة ريفيوهات أكل من بتوع " هايغرقوا مصر الجديدة جبنة و يبيعوا شرفهم لأى حد ياخد وجبة كومبو? المطعم ده عامل طن برجر ببلاش لأول 100 واحد يصلوا على النبى"

8- بالنسبة للأسامى عندك مدرستين: الأولى هى انك تسمى اسم عربى طالع من قلبه و روحه مصرى جداً كأنك ضربت واحد نجيب محفوظ مع ضحكة فلاحة مصرية مع شعر إيد عامل فى اسمنت السويس ( على الحصيرة- عيش و ملح- تعدمنى لو ما كلت- خد الورك ده من إيدى)

9- المدرسة التانية مدرسة الساندوتشات , ارزع اى حاجة اينجلش + كلمة برجر و ماحدش فاهم حاجة ( PMS burger- LGBT burger- political correctness burger )