مساء الخير .... ثريد سريع عن العربيات الموجودة حاليا في السوق المصري في فئة الكروس اوفر او ال suv اللي أسعارها بين ٢٥٠ و ٣٥٠ الف و اللي بيروحلها أغلب المشترين حالياً
+
الفترة اللي فاتت انا مكنتش بتويت خالص لأني كنت قاعد باتفرج على السوق و التوكيلات اللي نزلت موديلات جديدة و بتابع الأسعار و بحاول اعاين العربيات دي بنفسي عشان انقل تجربتي معاها و معظم او كل العربيات دي صيني عشان لو حد مش مقتنع بالصيني ميكملش الثريد
+
MG RX5
مازالت في وجهة نظري أحسن قيمة مقابل سعر في فئتها لحد دلوقتي بدون منازع في فئة ال ٥ ركاب متفوقة على الكابتيفا و التيجو ٧ لأنها اثبتت اعتمادية و جروبات الملاك ملقتش فيها أي مشاكل متكررة فيما عدا استهلاك البنزين و ده لو حد بيجري بالعربية فطبعا استهلاكها للبنزين هيكون عالي
+
Chevrolet Captiva
العربية عائلية بامتياز في فئة ال ٧ ركاب لكن عندي مشكلة مع التصميم و مع شاشة ال infotainment system اللي فيها و شايف ان تسعيرها مبالغ فيه جدا على امكانيات العربية و اللي محتاج حاجة لنفس الغرض يجيب Citroen C4 spacetourer قولا واحدا بدون ما يفكر.
+
Chery Tiggo 7
تسعير العربية ممتاز و المقصورة الداخلية بسيطة بس شيك و جميلة و اداء العربية مبهر و لكن!
مساحة الشنطة صغيرة نسبيا ٤١٤ لتر بس و طبعا عشان من غبور و تجميع محلي فبعض الملاك اشتكوا من عيوب في التقفيل كالعادة لكن لو تم تدارك الأمر فالعربية هتكون هايلة لشاب او أسرة صغيرة
+
