ياجماعة لا تخلون أولادكم الصغار دايم في البيت يصيرون خجولين ومايعرفون يسولفون ويواجهون الناس، خذوهم لمجالس الرجال، المساجد، خذ ولدك أو أخوك وأنت طالع مع أصحابك، سجله في نادي سباحة، كاراتيه، علمه يرعى الابل ويركب الخيل، ياجماعة اصنعوا منهم رجال، الجيل الصاعد من الأولاد جيل مهزوز.
الزواج مو أنه تتزوج وتجيب عيال وخلاص، أنت مسؤول عنهم أمام الله، الأم والأب لا تخلفون اذا بتخلون عيالكم ٢٤ ساعة على جوالات وألعاب وبلاستيشن وببجي وآيباد، ثم لما يكبر يطلع منطوي ومعقد، إذا مابتعطونهم من وقتكم واهتمامكم لا تخلفون أرجوكم، كلكم راعٍ وكلكم مسؤولٌ عن رعيّته.
ودايم تلقون البنت مع أمها في كل مكان، تلقونها اجتماعيه وحبوبة وتحب تسولف وملسونة وترقص وتلعب عكس أخوها، ليه! لأنها في بيئتها ومكانها الصحيح، مع البنات، لكن ولد ٢٤ ساعة مع أمه وخالاته وعماته! حتى في العزايم والتجمعات! تلقونه مستحي أو همجي مافيه وسط، عقد نفسية باختصار.
اعذروني على الإطالة لكن والله أني أحزن على كل ولد خجول ومنطوي في كل مناسبة نسائية، قلبي يعورني ما أبالغ، لأنه كان ممكن يكون طفل أفضل بكثير، اجتماعي وشجاع وجريء ومتعلم وموهوب، لكن للأسف يتزوجون ويخلفون بدون أي إحساس بالمسؤولية.
