الليلة حتكلم ليكم من خلال تجربتي مع وزارة الصحة وبالأخص ناس الوبائيات : أخوي من يوم التلات الفات بدت عندو أعراض كحة، نزلة، صداع، وحمة كانت بتكون ٤١ او اكتر مشى مستشفى الساحة وكانوا بيعاملوهو معاملة انو مصاب عمل كل الفحوصات وطلعت نضيفة حتى عمل أشعة للصدر ونضيفة
لكن حسب علمنا انو الفيروس بيظهر فالأشعة لمن يكون خلاص نزل ووصل الصدر او الرئة قمنا طلبنا انو يعمل فحص للكورونا قالوا انو الفحص في ستاك والا عن طريق الوبائيات وطبعا ناس المستشفى طلعوا أخوي استناداً على الفحوصات حقتهم
بعد رجع البيت عزل نفسو في غرفة بعيدة نطراً لأنو أمي مريضة سكري وماينفع يخالطها وبقى بيحاول في رقم الوبائيات وطبعا مافي رد وهو كان تعبان شديد بقيت بحاول انا في كل الارقام مابيردوا ردوا علي بعد عزاب وأخدوا مني العنوان والأعراض وكل حاجة وقالوا لي حنجيكم في أقرب زمن
أقرب زمن دا عدّى عليهو يومين وهم ماجو وأخوي الأعراض ما نقص فيها ولا شي والحمة كانت بس بالبندول بتنقص لكن اول مامفعولو يخلص بترجع بس كنا شغالين فالعلاجات البلدية اللي هي القرض وزيت السمسم والعسل بالليمون والزنجبيل
جينا تاني حاولنا مع ناس الوبائيات وكنا بنفتش زول يوصلنا ليهم عشان بس ياخدوا عينة ما الا يحجروهو بما انو مراكز الحجر اتملت لقينا واسطة واتصلوا علينا بعد عشرة دقايق وقالوا حنجيكم الليلة ناخد العينة وجهزوا ليهو شنطتو وحنجي متأخر
