? هذي تجربتي لسيارة #فورد توروس فل كامل تيتانوم 2024 الجديدة. تقرير بسيط وسريع.
.
جربتها في ظروف مختلفة من الطرق، الزين والمكسّر والحفر وحتى نزلت فيها ردمية. والتجربة بنزلها في سلسلة منشورات تحت.
⚠️ للمعلومية، هذا انطباع أولي وليس تجربة استخدام لفترة طويلة. لا تبني عليه قرار شراء #السيارة بشكل رئيسي، بل اجعله أحد النقاط المرجعية اللي ممكن ترجع لها أثناء بحثك في شراء #السيارات.
? السيارة أخذتها من شركة (ذيب) لتأجير السيارات، وأشكرهم على الاحترافية العالية في إجراءات الاستلام والتسليم، واللي وده يجرب السيارة تراها متوفرة في فروعهم حول المملكة.
? ولا تنس إضافتي في برنامج سىْـ-ـاب بنفس اليوزر
omar2drive
وهذا المحتوى ليس مادة إعلانـ-ـية مدفوعة عن السيارة.
? الأداء والهيكل:
السيارة مبنية على منصة فورد سي 2. نفس المنصة اللي مبني عليها برنكو سبور و لينكون كورسير وفورد إيدج الجديد و لينكون نوتوليوس لذلك أخذت ملامح راحة الركوب من علامة لينكون الفاخرة.
أما المحرك فهو 4 سلندر سعة 2.0 بتقنية ايكوبوست توربو حقن مباشر، يعطيك قوة 238 حصان على 5500 دورة بالدقيقة والعزم ممتاز 382 نيوتن يفتح ذروة نطاقه من 1750 دورة إلى 6000 دورة بالدقيقة. والقير أوتوماتيكي تروس 8 سرعات.
.
عزم الموتر ممتاز جدًا، سواء بالانطلاق من الصفر أو والموتر ماشي خصوصا اذا فتح التوربو، مع العلم ان تعليق التوربو خفيف جدًا وما يتأخر عن الاستجابة. ولاحظت ان الكفرات تفحط حتى والتراكشن شغال. والسيارة تعطيك اندفاع مستمر إلى سرعات عالية ما تحس عزمها يطيح.
? راحة الركوب والتكييف:
أول شي بتلاحظه هو المقاعد، تشعر انها مقاعد فورد اللي تعودنا عليها من ناحية الطراوة، ضغط الاسفنج المستخدم ممتاز جدًا لاهو قاسي ولا طري بزيادة، ممتاز جدًا. والخامة اللي استخدموا فيها التنجيد كذلك ممتازة، الاطراف جلد صناعي عالي الجودة، وبالمنتصف استخدموا خامة الجلد السويدي الشبيه بالكنتارا، وهو من الخامات الراقية والباردة. اختيار ممتاز جدًا.
المقاعد لاهي ضيقة ولا واسعة، جاية حاضنة، تمنيت لو كانت أوسع بشي بسيط جدًا، ويكون فيها دعم للركب. ومساحة الركوب بالخلف ممتااااازة جدًا.
.
أما التكييف ولا غلطة، ما عندي أي تعليق عليه سوى أنه ممتاز جدًا ويأدي الغرض وزيادة سواء بالوقوف او المشي.
? شعور القيادة:
نظام التعليق الأمامي من نوع مكفرسون والخلفي منفصل متعدد الوصلات مثل مثيلاتها. ولكن حتى الآن فورد توروس أكثر سيارة مريحة بالمطب في فئتها من تجربة، ممتازة في التعامل بالمطبات خصوصا في الجزء الأمامي ولا تحس انها تصدم المطب صدم. تمتص المطب بنعومة لدرجة معقولة جدًا. لكن في الاسفلت الخشن جدًا تشعر فيه بشكل متوسط، تقريبًا كل سيارات فئته نفس الشي بهذا الأمر.
.
طارة السيارة كهرب، تقريبًا هي المتوسط في فئتها، لافيها ثقل ولا فيها خفّة، لكن أفضل طارة مريحة من ناحية المقاس والطراوة، فيها طراوة ممتازة تخليك تشعر بالراحة وانت ماسك الطارة. الأفضل في فئتها من هالناحية. واستجابتها للانعطاف كذلك ممتازة وتستجيب بشكل دقيق، مثل منافساتها بالفئة ماهي متميزة بهالأمر. والازرار كلها بمتناول اليد، وتمنيت لو كان فيه تبديلات ورا الطارة. كان الشي الوحيد اللي ناقص.
.
بالنسبة للعزل، جربت #السيارة لسرعة 140 كلم مع حدود الطريق، العزل الصوتي ممتاز والقزازات الامامية مدبلة والعزل الارضي جيد جدًا ليس الأفضل في فئته لكن مقبول بشكل كبير واعتبره ضمن الثلاث الأوائل في فئة السيارة واتوقع لو يتغير نوع الكفر راح يتحسن بشكل ملحوظ.
? ما تحت الكبوت:
هذا فيديو صورت فيه الأشياء الأساسية تحت كبوت السيارة. الصيانة الأساسية للسيارة راح تكون متوسطة السهولة نوعًا ما لكن فيه بعض العقبات لو تبي تبدل الدينمو والكمبسر، وطرمبة الماء ميكانيكية ومكانها سهل للاستبدال. جهاز ABS جاي ورا وصيانته بتكون سهلة اذا فكيت البطارية.
