حابب استغل موضوع التريقة على مبرمجي ألمانيا و أتكلم على How to not take things personally
تنويه: رأيي يحتمل الصواب أو الخطأ
كشخص ذو شعر أحمر اتولد و عاش ف مصر ف أنا اتهريت تريقة على لون شعري و العيال كانوا بيشدوني من شعري و يتفوا عليه و يقولولي ألقاب ذي فانتا و حمرا و حزلقوم
الموضوع كبر و المدرسين بقوا ينادوني بالألقاب دي، ف الاول كنت بتضايق جامد و أتخانق مع أي حد يناديني بغير اسمي بس لقيت الموضوع متعب و بقيت أتقبل الموضوع و حتى بقيت مشهور برة مدرستي ب "ميريندا" .. و لما سافرت و روحت قارة تاني لقيت ناس بتقولي "انت مصطفى ميريندا ؟"
بيت القصيد ان الناس ميالة للتريقة بكل الطبقات من الفلاح لحد چيف بيزوس .. و لو الواحد أخد الأمور على صدره مش حيخلص .. الفرق بين التريقة و التنمر ان الأخير ممكن يسبب أذى نفسي أكبر و بيركز على شكل و جنس و لون و ممكن يوصل لخطاب كراهية .. من الآخر حاجات ملناش يد فيها
فيه ناس بتتقبل ان الباقي يتريق على شكلهم (انا مسمي كرشي عباس و بسمح للقريبين مني يتريقوا على كرشي .. لكن لو حد غريب ف ده بعتبرها اهانة و body shaming)
من الآخر، الشخص المستقبل للjoke بيحدد اذا كان ياخدها على صدره و يحس بالاهانة ولا يضحك مع الناس.
طب ازاي بنحدد ده ؟
والله ف موقف زي مبرمجي ألمانيا دي لا عاهة ولا مرض .. التريقة تريقة attitude العنطزة مش أشخاص بعينهم و هو لا بينشر خطاب كراهية ولا حاطط الناس في خطر
حقك ف الأول (كمبرمج ف المانيا) تتضايق بس ممكن تضحك مع الناس عادي
