حنا كشعب بطبيعتنا متكاتفين مع بعض خايفين على أنفسنا ودولتنا بسبب "هوايل" شفناها من حروب ومؤامرات واختراقات رغم عمرنا القصير "70 سنة تقريباً" بس والله شفنا وواجهنا وتحملنا الكثير وتجاوزناه بفضل الله ثم بفضل دولة حكيمة…طوال هالسنين متمسكين بمبادىء وقيم عربية أصيلة وإسلامية نبيلة
وبعمر قصير جداً مقارنة بأعمار الدول حققنا منجزات أو بالأصح معجزات…وفوق هذا ماقصرنا في المسؤوليات…نتبرع هنا ونحرر أرض هناك ونرسل درع الجزيرة ونحشد العالم لتحرير دولة من الغزو ونرسل جيش لفلسطين ونحمي اليمن من شلة مرتزقة منبطحة تحت أقدام الفرس
يعني تحديات + منجزات + مسؤوليات
هذي كلها في 70-60 سنة فقط… اذا استثنينا مرحلة التأسيس الي هي أصلاً معجزة بحد ذاتها…لين وصلنا السنوات الأخيرة مع انتشار الانترنت ووسائل التواصل الاجتماعي وبدينا نختلط بأفكارنا مع المجتمعات الأخرى بشكل مباشر بعيداً عن الوسائل التقليدية الي هي القنوات الدبلوماسية أو الصحف والأفلام
تفاجئنا بحجم جحود ونكران وحقد ماتعودنا كشعوب نتعامل معه بشكل مباشر…زمان الملك فيصل والملك فهد الله يرحمهم والدولة بشكل عام كانت تشوفه بشكل يومي وتعرفه بس حنا كشعوب نسمع به ولا نشوفه…مع الانترنت شفناه بعيونا وطوال السنين الماضية كنا نعيش على مبادىء هذولي اخوانا وعزوتنا وعمقنا
صدمة وراء صدمة وبدينا نكتشف ان اخوانا صاروا "إخوان إرهابيين" وان عزوتنا يرون عزهم بسقوطنا…وعمقنا الإسلامي هو أول من تآمر ضدنا…ليست مبالغة واذا تبي أمثلة عطيتك ومن "قريّب"…هذي الصدمات خلقت نوع من الخلخلة الفكرية خاصة عند جيل الثمانينات والتسعينات وصولاً للأجيال الناشئة…
