وبالنسبة للحبايب اللي هيقعدوا في البيت ومقلقين من الزهق أو الملل، ابقوا رسّوني انتوا بس وأنا أسربلكم شوية من البرنامج بتاعي اللي بتنقل بيه في كل حتة، ونحاول نعيد التعارف بينكم وبين العزلة وتشوفوها من وجهة نظر تانية

نرجع بقى للحبايب اللي على أعلى قدر من المسئولية والله اللي قرروا يقعدوا في البيت، ونعمل فنجان قهوة بس ونيجي نتكلم عن مشروع كبير من شوية حاجات حلوة كدا

مساء الفل، يللا بينا ..

١- شوفوا يا جدعان، انت هتجيب ورقة وقلم كدا وتكتب فيها كل أسماء الناس بتوع المزيكا اللي انت بتحبهم او حتى تعرفهم، مطربين بقى باندات، قديم، جديد، مصريين أو اجانب أي حد، هتكتب اسمه في الورقة دي بالترتيب حسب التداعي العشوائي ليهم في دماغك عادي بس من غير ترقيم دلوقتي

بعد كدا هتشوف مصدر اونلاين لأعلام تاريخ موسيقى معينة انت مهتم بيها، أنا مثلا دوّرت على تاريخ الموسيقى المصرية وخدت منه أسماء الموسيقيين بس وبعدين تكتبهم في ورقة تانية بترتيب وبدون ترقيم كذلك، لحد كدا تمام؟