مع قرب بداية السنة الاكاديمية التدريبية في السعودية للاطباء حديثي التخرج، هذي سلسلة تغريدات لعل وعسى تفيد من هم في بداية المشوار المهني. بداية مبروك لكل شخص قُبل في تخصصه، وحقيقة ما امتلك الخبرة الكافية للتوجيه لكن كلام بالخاطر وهذا اللي كان ودي اعرفه او عرفته خلال بداية تدريبي.

وبالواقع سويت السلسلة لان في شخص بيبدا رزدنسي باكتوبر وسألني ومن الكلام معه جمعت الاشياء اللي تكلمت عنها ورتبتها حتى توصل لشريحة اكبر ان شاء الله. ومايمنع تضيفون على كلامي لو عندكم شيء ?

1-قبل بداية دوامك بكم يوم حاول تتواصل مع رزدنت واجلس معه عشان يعلمك على اهم النقاط في ال EMR خصوصا لو ماكنت طالب او انترن بنفس المستشفى ولا تعرف للسستم ابدا، هذا الشيء بيسهل عليك البداية بشكل كبير ويخليك اسرع بمراجعة مرضاك خلال اول الايام.

2-كل مريض تشوفه لازم تتعلم منه حاجة، حتى وانت ماشي للاي ار عشان New admission اقرا بجوالك عن الاعراض او المرض قبل تشوف المريض. القراءة بالرزدنسي تختلف جدا عن كلية الطب ولازم تدخلها مع عملك اليومي عشان تقدر تفيد مرضاك وتستفيد بشكل اكبر انك ماتنسى المعلومات اللي طبقتها بالبيدسايد.

3- كل مريض تكون ماسك حالته لازم يكون فيه خطة علاجية ببالك من اول يوم الى اخر يوم من التنويم، لاتقدم معلومات المريض وتسكت! خل عندك بلان واضحة من قبل الراوند وحتى لو خطأ عادي الاستشاري يصحح لك هذا دوره. المصدر اللي يتفق عليه الجميع هو Uptodate لكن بعض التخصصات فيها كتب ومصادر افضل.