حابة اتكلم عن التغيير الي سار فحياتيّ فترة الحجر وايش الشي الي واجهتو وايش الشي الي كان صعب والي كان حلو وكل حاجة , اول شي انا من الناس الي جربت كل انواع الدايت ومافاد معاها وجربت الكيتو وحسيت اني بعدها زي الوحش ابغا اكل ايشي قدامي ووصلت لمرحلة اليأس انو خلاص انا ابغا اسوي تكميم!
لمن وصلت لدي المرحلة قعدت افكر بيني وبين نفسي لانو اول مرا فحياتي اوصل لدا الحجم واول مرا فحياتي يوصل وزني ٩٠ فكانت صدمه ليا صراحة بس كانت فترة اكتئاب نفسي واكتئاب دراسي ف دا الشي سار موبيدي بس اول ماطلع قرار تعليق الدراسة بسبب كورونا انا طلعت قرار اني حغير كل حاجة فحياتي!
انا وصلت لمراحل صحية متدهوره بسبب السمنه وحسيت انو خلاص معد اقدر لازم اسوي عمليه هنا حطيت حد لكل شي وجلست مع نفسي وحاولت افهم جسمي ايش يحب وايش يكرهه عشان ما احرمو من حاجة وبعدين انحف وارجع دبل اللي سويتو !! ف حاولت افهمو وافهم ايش حيفيدني وايش حيغيرني للاحسن
اغلب الحميات الغذائيه الي بيسوها الناس بيلاحظو انو اوقات مافي تغيير اوقات بيلاحظو فرق مرا كبير بس الصدمه لمن تجي فاليوم المفتوح ايامك بعدها تسير كلها مفتوحة او انو بعد الدايت دا القاسي كل شي يرجع دبل الي كان اول لانو الجسم ف وضعيه الوحش حقيقي !
انا بدات اول شهر كان شويه صعب عليا لاني حاولت اتدرج فالاكل عشان اكون تمام .
اول شهر كنت اصحى اصباح واسوي كارديو طبعاً الكارديو انواع كثير جدا ً والكارديو هيا التمارين الي تخلي نبضات القلب تكون سريعه ف دي اكتر تمارين تحرق دهون بالطات لو كانت على بطن فاضيه لانها تفضل تحرق طول اليوم
