بداية انتشار مراكز اليوجا والتنويم المغناطيسي والرقص وطاقة الجسم والجو ده.. كانت في الفترة بين ٢٠٠٥ ل ٢٠٠٩ في وقت الوفرة الاقتصادية اللي حصلت للبعض في كتير من الشركات.. فكان منطقي تطلع حاجات جديدة تبهر الفئات الجديدة وتخليهم يجربوا عوالم جديدة .. يتبع #prt

الموضوع كان له صدى بين البنات أكتر، ثم بدأ يلاقي جمهوره بين الولاد.

وفي رأيي ظهور المجموعات دي في الفترة دي سواء مجموعات لليوجا أو رحلات التأمل أو الرقص وما إلى ذلك، كنت بشوفها بحثا عن كونكشنز جديدة تناسب الاوضاع الاقتصادية الجديدة، أكتر من غرض الاستمتاع بالنشاط نفسه

مقصدش كونكشنز جديدة اللي هو البحث عن عريس أو عروسة، لكن عايزك تبص للأمر بنظرة عام ٢٠٠٥ مش بمقاييس دلوقتي خالص.

واحدة مثلا من أسرة متوسطة ودايرة معارفها كلها من منطقة متوسطة وبسيطة، وهوب اشتغلت في شركة ب٥ الاف جنيه، المبلغ ده خلال سنة قادر يرفع الشخص ولو شكليا طبقة أو طبقتين

فطبعا لو مكان الشغل مفيهوش شلة أصحاب تندمج معاهم، فكان الحل المثالي هو الاندماج في الجماعات التانية دي بتاعة الشباب الروشين سواء الاغنياء أو اللي بيصرفوا زي الاغنياء، وآخر فئتين دول بقوا يندمجوا مع بعض بسهولة عشان العيشة المرتاحة مكانتش مكلفة ولا فيها فروقات كبيرة زي دلوقتي

ساعتها بقى ظهرت حاجات زي واحدة هندية بتعمل كورس يوجا في المعادي، أو هنطلع رحلة تأمل في الفيوم، أو يالا كورس رقص في السخنة، وهنا الاغنياء واللي شبه الاغنياء لقوا نفسهم ولقوا مجتمعات جديدة عارفين يندمجوا فيها بسهولة، وأصدقاء جدد، في فترة ما قبل السوشيال ميديا