بما إن النهاردة الجمعة ودا معادنا مع قصة من قصص القرآن الكريم والسنة النبوية الشريفة..الاسبوع إللي فات أتكلمنا عن رحلة الإسراء.. الأسبوع دا هانقلكم الجزء الاول من رحلة المعراج إللي للاسف بعض الناس بتنكرها أو بتشكك فيها..هطول عليكم شوية بس تستحق القراءة..
وقفنا المرة إللي فاتت عند جبريل عليه السلام لما أعطى رسول الله ﷺ كأسين واحد فيه لبن والثاني فيه خمر،فشرب رسول الله ﷺ من الكأس إللي كان فيه لبن فقال له جبريل عليه السلام: هُديت وهُديت أمتك،والمتوقع إن رسول الله ﷺ يرجع بقى لمكة لكن كان في رحلة ثانية مستنياهﷺ
رحلة مختلفة عن أي رحلة، رحلة المعراج..يعني الصعود للسماء،
هنبدأ بإزاي رسول الله ﷺ طلع للسماء، رسول الله بيحكي وبيقول إنه طلع على حاجة زي السلم كده،
ولكن السلم ده مختلف، فهو مكون من ثلاث درجات، يعني يطلع الدرجة الأولى وبعدين الثانية وبعدين الثالثة وبعد الثالثة يوصل للسماء،
فكل سماء هيوصل لها هتكون بالطريقة دي، درجة اثنين ثلاثة وبعدين السماء وهكذا،
فصعد رسول الله ﷺ مع جبريل على السلم الثلاث درجات وبقى على باب من أبواب السماء الدنيا،
والسماء الدنيا إللي هي السماء الحقيقية مش الجزء الظاهر إللي احنا شايفينه ده.حتى رسول اللهﷺبيقول إنه لو أراد
إنه يلمس السماء للمسها،يعني يقدر يحط إيده عليها ويحس بيها زي ما بنحط إيدنا كده على الحائط مثلا..وطبعا مش هنسأل هو رسول اللهﷺكان بيتنفس إزاي وهو في الفضاءالخارجي ومفيش أكسجين..احنا بنتكلم عن رسول اللهﷺوبنتكلم عن ربنا يعني احنا برة السنن الكونية أصلا وبرة كل القوانين..
