نظرية:
اليوم جالسين نتقهوى انا واخواني نسولف عن موسم الزراعة ،، دخلت وحده تعرفونها وقالت بنبرة مليانة كبر واستحقار ان العالم يغلي وحنا همومنا تدور حول الجح والتمر ،، الوالد قصر على التلفزيون ثم طلب منها تشرح لنا نظريتها فقالت:
بريطانيا واغلب دول العالم اعلنوا الغاء القيود على
كورونا بعدها بشهر دخلنا في حرب ومشاكل وانتهى كل خوف من كورونا ومعد صار احد يتكلم عنها ،، وهذي ليست مصادفة (هنا ابوي استقعد زين وحنا ركزنا حسينا ان كلمة مصادفة وراها تفسيرات ماتحتمل التجاهل) ،، كملت شرح بكلام طويل مفاده ان كورونا ماراح تنتهي اثاره النفسية اللي تسبب بها على البشر
بدون شي اقوى منه يخليهم يخافون ويصير هو هاجسهم مثل الحرب العالمية الثالثة والنووي ،، ثم قالت كل اللي تشوفونه متفقين عليه عشان يحلون مشاكل قديمة ويوزعون حدود الدول بينهم لأن كورونا خسرتهم ودخلوا في تضخم ومشاكل ،، وهذي الدول الضايعة مثل اوكرانيا ماينفع تكمل معنا بعد كورونا لانهم
بيصيرون عالة على العالم ولازم الدول الكبيرة تتولاها وتدير سياساتها ،، انا هنا ماتحملت ،، اخوي من ابوي كان جالس يسمع وساكت وهو فاهم بالسياسة بس دايم يجاملها ،، قلت له شرايك بكلامها؟؟ قال عندها وجهة نظر ويكفي انها تفكر وتربط وتحلل ،، ردت عليه قالت انت سمعت اللي انا قلته؟؟
قال ايه؟؟ قالت لو سمحت اشرحلي وش جالسة انا اقول لاني مب فاهمة منه ولاشي ،، قريته اليوم وابغى اعرف وش السالفة وليش روسيا يبون يحتلون امريكا ،، الوالد قال وش دخل امريكا؟؟ قالت اوكرانيا مب بامريكا؟؟ على طووول عطانا ظهره وزاد على صوت التلفزيون واخوي الكبير استاذن ومشى ماكمل بيالته?
